قانلی سحر عاصم اردبیلی

قانلی سحر

گزیده اشعار ترکی عاصم اردبیلی

حورمتلی اوخوجولارین حضورونه تقدیم ائتدیگیم شعرلرین چوخ حصه سی، شانلی و عظمتلی اسلامی انقلاب دان سونرا یازیلیب دیر. شعرله منیم باغلیلیغیم، عشق ایله کؤنول آراسیندا اولان رابطه یه بنزه ر. منجه شاعرده شور و عشق اولماسا، یازدیغی سؤزلر، شعر اولماز. بللی دیر کی شعر تانیانلار، بو مقوله ده، یاخشی راق قضاوت ائده بیلرلر.

دئمک لازیمدیر کی بیزیم آذری ادبیاتیمیزدا، فعلی حالدا، چوخ قدرتلی شاعرلر و یازیچی لار وارکی اونلارین بعضی سی، شعر و مدنیت و عرفان اوجاغی یعنی اردبیل شهریندن قالخمیشلار، اونلار بوللو، دیرلی اثرلر یارادیبلار، لاکن چاپین آغیر هزینه سی، او اثرلرین یاییلماسینا، مهم مانع لردن ساییلیر، بیر آرزوم بودور کی فرهنگ سئور اینسانلار و آذری ادبیاتیمیزا علاقه لی اولانلار، همت ائدیب، مولف لریمیزین قیمتلی اثرلرینی، سرمایه قویماقلا، کیتاب شکلینده، شعر و ادب سئونلرین اختیارینده قویسونلار.

من بو کیتابین توپلانیب یاییلماسینی، هر کیمسه دن باشقا، آذری ادبیاتیمیزین دوزگون، باجاریقلی و قدرتلی خادمی، عباسعلی یحیوی -ائلچی- معلمه مدیونام. نییه کی اونون تشویق لر و گؤستریشلری، اولماسایدی، شاید بو شعرلر، بو تئزلیکده نشر اولمازدی…