بو تورپاقلی یام عاشیق عزیز شهنازی

عاشیق عزیز شهنازی

کیتاب: بو تورپاقلی یام

عاشیق عزیز شهنازی دن و یا خود اونون یارادیجیلیغیندان صحبت آچماقدان قاباق، منجه نئچه سطیر ادبیاتیمیز حاققیندا یازماق، یئرینه دوشر. اونا گؤره ده ایستردیم بئله باشلاییم:

بوتون دونیا خالقلارینا منسوب اولدوغو کیمی، بیزیمده ادبیاتیمیز ایکی اساس قولدان تشکیل تاپیر: 1) شفاهی خالق ادبیاتی یاراداجیلیغی 2) یازیلی ادبیاتیمیز. هله بونو دا علاوه ائتمک لازیم دیرکی، شفاهی خالق ادبیاتی بایراقدار اولدوقدا، یازیلی ادبیاتیمیز اوندان یول آلمیش و یارانمیشدیر. بئله بیر یاراداجیلیق یولودا، یئنه ده، ائله بوتون دونیا خالقلارینا منسوب دور. یعنی بوتون دونیا خالقلارینین باشدا شفاهی خالق ادبیاتی یاراندیقدان سونرا، اونون یازیلی ادبیاتی یارانمش دیر.

شفاهی خالق ادبیاتی نه قدر دئسه نیز زنگین اولدوقدا بیر اوقدرده رنگین دیر. آنا وطنیمیز آذربایجاندا، دوغما یوردوموز اودلار یوردوندا، بئله بیر یارادیجیلیق یولونون، دئدییم کیمی رنگین و زنگین صنعت قولاری اولموشدور، نمونه اولاراق اونلاردان آد چکسک…

عاشیق عزیز شهنازی قوجامان عاشیقیمیز، مدریک صنعتکاریمیز استادنامه لرینی استادلیقلا قلمه آلیر. اصل معناسیندا وطن عاشیقی، خالق وورغونو کیمی چیخیش ائدیر:

حؤکمران اولسایدیم ائل آراسیندا

من اؤز اورییمی ائله وئرردیم

ییغاردیم وطنین، ائلین خائنین

یازدا داشقین گلن سئله وئرردیم

بئله بیر باشلانیش لا فیکری بیان ائتمک، بئله بیر دئییم طرزیله دوشونجه نی آچجماق، ان لازیمی بیر یولدور بیر یارادیجی قوجامان عاشیقدان، بیر آق ساققال صنعتکاردان. اودا کی عاشیق عزیز شهنازی یارادیجیلیغیندا نئجه ده آچیق_آیدین گؤز اؤنونده دورور. سئله وئرملی اولان وارسا، شهنازی باخیمیندان حکما او وطنله ائلین خائنی اولمالی دیر:

عزیز دئییر اورییمده یارا وار

اودور بو دونیانی منه ائدن دار

یارادان وئرسئیدی منه ایختیار

تیکانین عؤمرونو گوله وئرردیم

باخ توتاق ائله بو دؤرد مصراع دان، عزیز دئییر اورییمده یارا وار. بو یارا گؤرن ندیر شهنازینین اوریینده؟ او منجه، سون مصراع دا اؤز سؤزونه لازیمینجه جاواب وئره بیلمیشدیر…