کلیات علی آقا واحد

کلیات علی آقا واحد

توپلایان: پروفسور محمد تقی ذهتابی

علی آقا واحدین کیتابی دفعه لرله ایراندا چاپ اولوب، دیلیمیزه چیخان کیتابلار سیراسیندا ان چوخ ساتیلان اثرلردن بیریدیر. واحدین شعر کیتابی مختلف فورمالاردا چیخسادا، اونلارین هاممیسیندا بیر چوخ یانلیشلار موجوددور. آنجاق دوکتورون، ایپه-ساپا دوزدوگو بو کیتاب هر باخیمدان تقدیره لایق دیر. دئدیگیمیز کیمی، عالیم، علی آقا واحدله یاخیندان تانیش اولوب اونونلا بیر چوخ خاطره لری اولدوغونا گؤره، بو اثر اوستونلوک طلب ائدیر. باشقا جهتی اوندان عبارتدیر کی، عالیم واحدین شعرلرینه یئری گلدیکده اتک یازیلار علاوه ائتمیشدیرکی، بودا دوکتور زهتابینین اؤزونه مخصوص بیر ایشدیر.
من بوردا علی آغا واحد باره ده آرتیق سؤز آچماق فیکرینده دئییلم. اونا گؤره کی، دوکتور زهتابی شاعیرله کئچیردیگی خاطیره لری اثرینده شاعیر باره ده اولدوغو قدر سؤز آچمیشدیر. (بهروز ایمانی)
واحدین غزللری روحی و عاطفه نی خیال عالمینده دولاندیریر، بوتون اورکدن گئچن و اومودا باغلی اولان آرزیلاری تجسم ائدیر، انسان شاعرانه بیر دنیاده قانات چالیپ اوچور، غزل دنیاسیندا ایسته دییی یئرلری گزیر. گلزارلاردا بولبوللرین چه چه وورمالارین ائشیدیر، یاسمن و بنفشه و قیزیل گوللر یانیندا اوتورور و اونلارین عطرلری ایله مست اولور، دونیا اونا گئنیشله نیر، بوغونتولاردان آزاد اولور، یاواش یاواش سئوودییی معشوقه سین یانیندا گؤرور، سانکی بو غزللر اؤز اورییندن چیخیب و هیجران شیکایتلرین اؤز سئوگیلیسینه سؤیله ییرـــ لاکن واحدین غزللری روحی و عاطفه نی خیال عالمینده دولاندیریرسادا همان عالمده دولاندیریر کی وجودی وار و درویشی و خرافی بیر دنیا دییل. عزیز اوخویانلار گومان ائتمه یین کی من او قدرت و یا باجاریقین صاحیبییم کی بؤیوک شاعریمیز علی آقا واحدین اوستادانه غزللرینین باره سینده نظر وئریب و ایظهار عقیده ائدم، خیر، هنوز او قدرت و باجاریق منده یوخدور.(یازار: مرداویز)

اولماسادا@
یانیندا دلبریمین اعتباریم اولماسادا / یئنه غمین چکرم، غمگساریم اولماسادا
بدنده یاری جانیم قالماییب، گئدیب یاریم / گرک دؤزم غم-هیجرانه، یاریم اولماسادا
گونوم کی، تار اولوب اول زولف الیندن، ای تاری / ترنم ائیله، سنی تاری، تاریم اولماسادا
اؤزون خیالی بسیمدیر بهشت-کویوندا / یوز ایل خیالیما گلمز، باهاریم اولماسادا
لبینله مست گؤزون هر دوشنده خاطیریمه / شرابه رغبتیم آرتیر، خوماریم اولماسادا
منیم بیر آهیم ایله شمعلر یانیر گئجه لر / توخونما، شعله عشقم، شراریم اولماسادا
کمند-زولفله واحد، اؤزوم شیکار اولدوم / منیم او آهو باخیشلی شیکاریم اولماسادا