بیلیجی بهلولون لطیفه لری

بیلیجی بهلولون لطیفه لری (لطیفه های بهلول داننده)

نظمه چکن: حسین محمد خانی (گونئیلی)

کئچن رژیمده دیلیمیز یاساق ایدی. آنا دیلده اثر یارادانلار ائله یه بیلمیردی لر اؤز اثرلرین چاپا وئریب، اوخوجولار آراسیندا یایسینلار. انقلابدان سونرا دیل آزادلیقی حتی بو امکانی وئردی کی، هر قوم مدرسه ده فارس دیلی ایله بیرلیکده اؤز آنادیلینی یازیب، اوخوسون و اؤرگشسین. آذربایجان یازیچیلار و شاعیرلرینهمساعد امکانلار یاراندی. باغلانان دیللر آچیلدی، سینان قلم لر یازماغا و گؤزل اثرلر یاراتماغا باشلادی. آز بیر مدتده آلولار یوردو و آذربایجان دیاریندا اقتدارلی شاعرلر قدم عرصیه قویدولار و ادبیاتین مختلف ساحه لرینده اؤز طبع لرین سینادیلار.
جوان شاعرلریمیزدن بیریسی ده “گونئیلی” تخلصلو حسین محمد خانی، علی اوغلودور کی، گونش ایلی 1334 ده خامنه جوارینده میشوغ داغینین اتگینده “مشنق” کندینده بیر زحمتکش اکینچی عائله سینده دونیایه گؤز آچدی.
او ابتدائی تحصیلاتینی بئشینجی صنفه قدر اؤز دوغما کندی مشنق ده آلیب، کندده راهنمایی دؤره سی اولمادیغیندان ایشله مگه تهرانا گلیب، گوندوزلر ایشله ییب و گئجه لر دبیرستان تحصیلاتینی بیتیرندن سونرا عائله تشکیل وئریب، تهرانین حومه سینده آزاد شغل ایله امرار معاش ائدیر.
گونئیلی اولجه نوحه شعری دئمک ائیله، شعر دئمگه باشلادی و سونرا شعرین مختلف ساحه لرینده اؤز طبعینی سینادی.
بهلول داننده نین 35 لطیفه سین تورکجه نظمه چکدی و بو سیناقدان دا یاخشی چیخدی. بو مجموعه ده بو منظوم لطیفه لر حرمتلی اوخوجولارون نظریندن کئچه جک بو جوان شاعرین پارلاق و امیدوار اولمالی گله جگی وار و بیز اولو تانریدان اونون اوچون ادبیات ساحه سینده نائلیت لر دیله ییب، اخلاقی، مدنی و اجتماعی اثرلر یاراتماغا انتظار چکیریک…

بیر قیش گونو کی قار یئره شیدتله یاغیردی
بهلول ائوینه گلدی تئز آروادی چاغیردی
قوی خورجونا امر ائیله دی قارپیز توخوموندان
وئر ایندی منه چون گئدیرم اکمه گه بستان
آرواد دئدی دیوانه لیگیندن کیشی ال چک
یازدا اکیلر بستان اونو سنده او وقت اک
بستان بونو بیل گلمسه یاز چؤلده جوجارماز
چیخسان چؤله بیرده سنی قوردلار دیری قویماز
ائوده دونوروق گؤر نئجه چؤللر داها بوزدور
جان قیمتی فیکر ائیلمه ایندی اوجوزدور
بهلول دئدی بو ایشلره سن ائتمه دخالت
دور وئر توخومو ائیله منیم فیکریمی راحت
مجبور اولوب آرواد کیشی نین امرینه باخدی
قویدو توخومو خورجونا بهلولو بوراخدی
بهلولدا توخوم خورجونو چیگنینه چکدی
گئتدی چؤله آخرده یئمیش قارپیزی اکدی
…