بیر دسته گول حسین دوستی

بیر دسته گول

حسین دوستی

قاراداغ شاعرلرینین تذکره سی

گؤزه للیکلر یوردو، قوچاقلیقلار بئشیگی اولان، مقدس تورپاغیمیز آذربایجان، ائله جه ده هنر و ادبیات اوجاغی اولموشدور. اینجه خیاللی، ده رین دوشونجه لی و عمومِ بشریت اوچون سعادت آرزیلی شاعرلر بئجرمیشدیر. قره داغ ماحالی، آذربایجانین بیر محتشم بؤلگه سی دیرکی اونودولماز شخصیتلر بئجردیب و آذربایجانین شعر و موسیقی اوجاقلاریندان ساییلیر. قره داغ، وطنیمیزین چیرپینان اوره گی، گؤره ن گؤزودور. اونون صفالی سیرا داغلاري، گؤزه ل هاواسی، یاشیل مئشه لری، دره لر بویو شاققیلتی ایله آخان سولاري، باش باشا وئریب، قره داغلی لار کیمی دوشونجه لی اینسانلار، هنرمندلر بؤیوتموشدور. سایسیز قالالار و مقدس آبیده لرین قره داغدا یئرله شمه سی، تصادفی حال دئیلدیر. قره داغلیلارین ایللر بویو یابانجیلار اؤنونده دایانیب، آزادلیق یولوندا مبارزه آپارماقلاری، ادعامیزی ثبوت ائدیر. اؤنا گؤره ده سنگرلرده بوي آتان آزادلیق سئوه ن بیر میلّت، سازسیز و سؤزسوز یاشایا بیلمه زدی. قره داغ، آشیقلار و شاعرلر مسکنیدیر. هله اونون آشیقلاري، شاعر دیلر. قره داغدا آنادان اولان اوشاقلار، ائله بیل شاعر دنیایا گلیرلر. آنالارین لایلاسیلان بوي آتیب، آشیقلارین سازینان توي ائله ییب، ننه لرین آغیلاري و اوخشامالاریناندا تورپاغا گئدیلّر!

قره داغ شاعرلري، وقارلی، کونلوتوخ انسانلاردیلار. اولار شهرت ایچون شعر یازماییبلار، ادعاسیز شعر یازیب، گئجه گوندوز اثرلر یارادیب، ادبیاتیمیزا بویوك خدمتلر ائدیبلر. اولارین شعرلري، خالقین اوره یینده یئر توتوب، دیلدن دیله آخیب، شهر به شهر یول آچیب، قولاغلاردا قالیب. کتابسیز، دفترسیز، بیر بویوك دیوان
یارادیبلار.

قره داغ شعرینده، ایسته رسه کلاسیک فورمالاردا، ایسته رسه سربست شعرده، وطن دویغوسو، خالقا باغلیلیق، سئوگی محبتی، دینی  عرفانی ایدیال لار، طبیعت وورغونلوغو،… دالغا ووروب، اوخویانی  ائشیدهنی واله ائدیر. قره داغ بؤلگه سینی مختلف ماحاللار تشکیل ائدیر. بو شعر مجموعه سینده قره داغین 18 ماحالینین شاعر لریندن سؤز آچیلیب. آللی گوللو یایلاقلاردان، دومانلاردا گیزله نن قایالیقلاردان، داغلارین آراسیندان، شوش قایالارین باشیندان، عطیرلی چیچکلرین اویلاغیندان، محبتلی  سئوینجلی ائولرین اوتاغیندان، بوتون کندلردن، اوبالاردان، شهرلردن، شاعر لرین سراغینا گئدیب، اولاردان شعرلر گتیرمیشیک. اهر، کلئیبر، خودافرین، هریس، ورزقان، خاروانا، هوراند،…! شاعرلرین آدي، یاشاییش تاریخی اساسیندا یازیلیب و ردیفلنیبدی…